CEBU, Philippines - Ang Akbayan Youth – Cebu (AYC) mikondenar sa mga kadagkoan sa St. Theresa's College (STC) gumikan sa kapakyas niini sa pagtuman sa Temporary Restraining Order (TRO) nga giluwat sa korte nga nagtugot sa ilang mga tinun-an nga makapaso sa graduation ceremony niadtong miaging adlaw.
Sumala pa sa tigpamaba sa AYC nga si Mikay Dumaboc nga dili makiangayon ang gibuhat sa maong tulunghaan nga miamong sa katungod sa mga tinun-an nga makapaso unta atol sa ilang gradwasyon gumikan lang sa hulagway nga na-poste niini sa social networking site nga Facebook.
Nagkanayon si Dumaboc nga dili na hurisdiksyon sa STC ang Facebook busa dili na kini angayan manginlabot sa gibuhat sa maong mga tinun-an nga babaye.
Panawagan sa Akbayan nga kinahanglan nga ma-contempt ang STC gumikan sa kapakyas nila pagtuman sa mando sa korte.
Usa sa gihikay karon sa Akbayan mao ang dinalian nga pagpasar sa Students’ Rights and Welfare Bill nga anaa na karon sa ikaduhang pagbasa didto sa kongreso.
Nalakip sa maong balaodnon ang pasidaan nga kinahanglang dili manginlabot ang usa ka eskwelahan sa personal nga kinabuhi sa ilang mga istudyante.
“Louy intawon kaayo ang mga estudyante, unsa may labot sa school sa FB? Iya man kanang personal nga kinabuhi sa estudyante, matud pa ni Dumaboc.
Nanghinaut si Dumaboc nga dili unta kini mahitabo sa ubang tulunghaan sanglit dili lalim nga makuhaan og katungod ang mga tinun-an nga makapaso gumikan lang sa pagbutang nila og hulagway sa Facebook, usa ka butang nga personal nila ug walay koneksyon sa ilang pag-eskuyla. (BANAT NEWS)