Kagawad nalatayan sa trak

CEBU, Philippines - Tungod sa iro nalatayan sa ligid sa 10-wheeler truck ang barangay kagawad sa usa ka barangay sa lungsod sa Barili pasado alas-7 sa miaging gabii diha sa national highway sa barangay Tolo sa lungsod sa Alcantara.

Ang biktima mao si Nelson Escoreal Libaton, 36, kagawad sa barangay Minolos lungsod sa Barili.

Sa pakighinabi sa Banat News ni SPO1 Ruben Lahiluden, sa Alcantara Police Station, patubang sa ilang lungsod ang biktima gikan sa lungsod sa Moalboal.

Pag-abot sa nahisgutang lugar giingong mi-overtake si Libaton sa nag-unang 10-wheeler truck nga gimaneho ni Delfin Glabog Canape , 53 , nga drayber sa trak sa Vic Sato Transport Corp.

Apan naatol sa pag-overtake niini gikatahong dunay usa ka iro nga kalit nga milabang sa atubangan ug naligsan kini ni Libaton apan natumba ang iyang motorsiklo diha sa tungatunga sa dalan.

Ang trak nga unta gilabyan ra ni Libaton wala makabantay sa kalit nga pagkatumba sa motorsiklong nag-una kaniya ug naligsan gyud ang lawas sa maong opisyal apan wala mohunong ang trak ug mipadayon kini sa biyahe.

Si Canape didto na sa lungsod sa Ronda nasikop sa kapolisan human gialarma ug nangangkong wala gyud siya makamatikod nga duna siya’y naligsang tawo.

Gipaabot pa nga pasakaan og kaso karong adlawa si Canape. (EIM)(BANAT NEWS)