Truck ban sa Northern Metro Cebu gihangop

CEBU, Philippines - Gihangop sa mga magpapatigayon ang gipatuman nga synchronized truck ban sa lungsod sa Liloan, Consolacion, dakbayan sa Mandaue, dakbayan sa Lapulapu ug lungsod sa Cordova.

Ang pagpatuman sa maong synchronized truck ban maoy nahukman sa gihimong panagtigom nga gipatawag   ni Gobernador Gwendolyn Garcia nga gitambongan sa mga magpapatigayon ug mga mayor sa maong mga lugar.

Si Mayor Jonas Cortes sa kagamhanan sa dakbayan sa Mandaue maoy unang nagpatuman og truck ban sa mga delivery trucks sa katuyoan nga mapaluagan ang bul-og sa trapiko sa kadalanan sa maong siyudad.

Partikular na niini ang peak hours sa buntag ug sa gabii nga maoy sagad ipangsulod ug gawas sa mga tinun-an ug trabahante sa mga oras nga alas-6 hangtud sa alas-8 sa buntag ug alas-4 hangtud sa alas-8 sa gabii.

Si Eric Mendoza, presidente sa Mandaue City Chamber of Commerce and Industry (MCCI) namahayag sa mga tigbalita gihangop nila ang synchronized truck ban. 

Gipaubsan   hinuon ni Cortes ang maong oras sa truck isip pagsanong sa hangyo sa mga negosyante sa alas- 6 sa buntag hangtod alas-8 sa buntag ug alas- 5 ang takna sa hapon hangtod na lamang sa alas-7 ang takna sa gabii.

Wala hinuoy labot sa truck ban ang mga trak nga nagkarga og malata o madaot nga produkto sama sa isda, utanon ug ingon man mga    refrigerated items.

Susamang lakang usab ang gipatuman ni Mayor Paz Radaza sa dakbayan sa Lapulapu, daan nang napanglantawang mokisikisi gyud ang pipila ka mga negosyante niini maong wala na ikatingala sa mga lokal nga kagamhanan ang mga reklamong gipadangat kanila.

Si Atty. Mariano Martiquilla nga maoy provincial officer sa Sugbo misugyot nga kinahanglang ang truck ban gisuportahan og ordinansa sa konseho sama sa gibuhat sa dakbayan sa Mandaue.  (BANATNEWS)