Bayongbayong gipusil angol sa sikyu

CEBU, Philippines - Naangol ang usa ka bayongbayong human kini pusila sa usa ka security guard kay buot untang mangawat sulod sa usa ka pabrika sa mga muwebles sa barangay   Paknaan, dakbayan sa Mandaue sa miaging kaadlawon.

Ang nakapusil nga guwardiya mao si Ananias Robiller, 30, nga taga barangay Tayud sa lungsod sa Consolacion ug nadestino sa Aurora Export and Import Inc. nga nahimutang sa maong dapit.

Si PO3 Marino Lufranco mibutyag sa Banat News nga ang suspetsado mitahan dayon sa ilang buhatan human sa hitabo.

Mitug-an kini nga sa wala pa ang hitabo ang biktima nakita niya nga may kauban usab nga sama kaniya og pangidaron nga misulod sa compound sa establisamento nga iyang gibantayan nga nagdala og kariton.

Unya sa didto na kini sa sulod, wala kini makabantay kaniya ug gipamunit ang mga puthaw ug mga junk nga butang sulod sa compound  ug gikarga sa ilang kariton.

Si PO3 Lufranco miingon nga sa kabalaka sa maong guwardiya nga masakiyo niini sa gawas ang maong mga butang nga gikarga sa ilang kariton, iyang gipusil ang biktima ug naigo kini sa tuhod.

Samtang gipusil usab niya ang laing kauban sa biktima apan mikabad kini og dagan sa gawas sa compound hinungdan nga wala kini maigo.

 Ang biktima gihatod dayon ngadto sa Mandaue City Hospital diin kini kasamtangang giatiman sa mga doktor.  (BANATNEWS)