Hubog naligo sa dagat nalumos
CEBU, Philippines - Usa ka lalaking hubog sa bino nalumos samtang naligo sa dagat sa barangay Looc, dakbayan sa Danao sa miaging hapon.
Ang biktima nailhan nga si Rodulfo Rica Calderon, 46, nagpuyo sa nahisgutang lugar.
Sa pakighinabi sa Banat News ni PO1 Wendell Baritua sa Danao Police Station , kini misaysay nga ang biktima uban sa iyang mga silingan ug mga higala nag-inom dayon nangaligo sa dagat sa maong higayon
Gumikan kay mga lasbag na wala nay nakabantay sa biktima nga wala na kini makatunga human kini magsawom-sawom sa dagat.
Didto na sila makamatngon nga patay na ang biktima dihang milutaw kini sa dagat nianang alas 4:00 na sa hapon.
Gisakwat dayon sa mga kauban ang biktima ug gihatod sa tambalanan apan gideklarar sa doktor nga patay na kini.
Dugang pa ni Baritua nga ila pang gipa-eksamin ang patay’ng lawas sa biktima aron masayran kun unsay hinungdan sa kamatayon niini. (BANATNEWS)
- Latest
- Trending
