CEBU, Philippines - Subling mipahimangno si Cebu Governor Gwendolyn Garcia kabahin sa baruganan sa lalawigan sa Sugbu batok sa mga malaw-ay nga mga pasundayag panahon sa Semana Santa dinhi sa lalawigan.
Ang maong pasidaan gihimo na ni Garcia sa nanglabay’ng mga katuigan apan iyaha kining gibalik pagpahinumdom sa pagtuong dunay mga tawong nagpaabot niini.
“My policy has not changed, I had hoped that I would not need to remind them but tingale’g moingon wa man ko ninyo warningi,” matud pa ni Garcia niadtong Biyernes.
Ang pasidaan ni Garcia subling gipagawas samtang liboang mga lokal ug langyaw’ng mga turista ang gipaabot nga modagsa sa Sugbu ilabi na sa lungsod sa Sta. Fe sa Bantayan Island nga naandan nang dagsaon matag Semana Santa.
Sukwahi sa ubang mga dapit nga pag-ampo ug pagpamalandong sa espirituhanong katagbawan ang himuon, ang mga residente sa Sta. Fe magselebrar sa ilang kapistahan ug iparada pa ang mga litsong baboy atol sa Biyernes Santo. (BANATNEWS)