Mag-uuma nadasmagan patay

CEBU, Philippines - Namatay samtang giatiman sa mga doktor ang 52- anyos nga mag-uuma nga nabanggaan sa motorsiklo nga gimaneho sa usa ka lending collector eskina sa Burgos ug Tabotabo St. , sa barangay Kwatro Poblacion sa lungsod sa Tuburan kagahapon sa alas 11:15 sa buntag.

Ang biktima nga namatay mao si Mario Cabatingan Gensis , 52, taga sitio Buswang sa barangay Bago, Asturias, samtang ang nakadasmag niya mao si Ronald Ortega Dela Cruz, 20, taga Samosa lungsod sa Tabogon.

Matud ni PO1 Nelson Sadili sa Tuburan Police Station dihang nahinabi sa Banat News nasalipdan sa laing bus pasaheroan nga naghunong ang biktima atol sa pagtabok niini sa crossing ug mao puy pagtabok sa maong kolektor.

Human nadasmagan ang biktima nalamba kini sa semento ug nabunal ang ulo, dali kining gitabang ug gihatud sa Tuburan District Hospital apan pagka udto giingong namatay kini.

Samtang ang drayber sa motor boluntaryong mitahan sa iyang kaugalingon ug nabalhog sa karsel samtang gihikay ang kasong ipasaka batok niya. (BANATNEWS)