2 gidudahang 'nag-bombing' og shabu sa CCJ nadakpan

CEBU, Philippines - Duha ka mga managhigala nga gidudahang gun for hire nga nabilanggo na sa Cebu City Jail kaniadto ang nadakpan pag-usab sa mga sakop sa City Intelligence Branch       (CIB) sa Cebu City Police Office (CCPO) niadtong Huwebes sa alas-4 sa hapon diha gawas sa maong bilanggoan sa barangay Kalunasan sa dakbayan sa Sugbu.

Ang duha gipasanginlan sa mga jailguards sa CCJ nga maoy responsable sa ‘bombing’ o pagpanglabay og ginadiling drugas gikan sa gawas sa paril sa maong bilanggoan padulong sa sulod nga puniton sa kakunsabong binilanggo.

Si Chief Insp. Romeo Santander, hepe sa CIB nga nahinabi sa mga tigbalita miila sa ilang dinakpan nga sila si Jessie Mahusay,39, taga barangay Pahina Central ug Louie Anam, 27, taga barangay Kalunasan kinsa barkada ni Arnel Gomez alyas ‘Budlat’ kinsa anaa karun sa CCJ.

Si Budlat nadakpan sa mga sakop sa Special Weapons and Tactics (SWAT) duha na ka semana ang nakalabay human nakuhaan og .45 nga kalibre sa armas may silencer ug mga buhing bala.

Si Gomez gilambigit sa pag-ambush patay sa magtiayon diha sa dakbayan sa Lapulapu mga tulo na ka semana ang nakalabay, apan hugtanon kining gihimakak ni Gomez.

Matud ni Santander nga nanawag kaniya ang jail warden nga si Supt. Johnson Calub ug nagpakitabang human masigpati ang duha diha sa gawas sa CCJ nga giingong kanunay na nilang makit-ang magpatungod sa maong bilanggoan.

Ang duha maoy gidudahan nilang responsable sa paglabay og shabu sulod sa bilanggoan.

Niadtong Huwebes alas-4 sa hapon miadto sa CCJ ug mipahigayon og checkpoint ang CIB ug gipangrekisa ang mga tawo palibot sa maong bilanggoan apan matud ni Santander ang tuyo gyud nila niadtong higayona mao sila si Mahusay ug Anam,

Matud ni Santander ang kapuyo ni Gomez mibisita sa CCJ ug ang bag niini gibilin sa baggage counter ug paggawas niini gipakuptan sa duha diin gisulod ang usa ka paketeng shabu ug armas nga .38 revolver.

Hinuon giangkon ni Mahusay nga iya kadtong armas apan walay miangkon kanila sa shabu nga nakuha sa kapulisan ug mipasangil nga ‘’planted’ kini sa kapolisan.

Si Mahusay miangkon nga suod silang higala ni Gomez ug tungod niini nagduda ang kapulisan nga posibleng kauban sila ni Gomez sa ilang mga ilegal nga kalihokan. (/EIM) (BANATNEWS)