Gidunggab nakabawos sa nanunggab

CEBU, Philippines - Kritikal ang kahimtang sa 57 anyos nga lalaki human kini dunggaba sa iyang silingang kasinumbagay kinsa nabawsan usab niya og luba didto sa barangay Lower Bangcasan, lungsod sa San Remegio sa miaging kaadlawon.

Si Marcelino Serafin Quinatadcan, 57 , minyo,   nga taga Lower Bangcasan, samdan sa nagkalainlaing bahin sa lawas, samtang ang nakadunggab kaniya nga iya usab nga   nadunggaban mao si Leo Canete alyas Waway, 28, ulitawo, apan dunay kapuyo nga silingan sa biktima.

Si PO3 Carlito Pasenio sa San Remegio Police mibutyag sa Banat News   nga ang biktima maayong pagkahinanok sa pagkatulog niadtong tungora dihang gipukaw sa iyang anak tungod sa nabati nilang mga buto -buto sa armas sa ilang palibot unya gilabay usab og bato ang ilang atop.

Dihang migawas ang biktima ug gisusi ang tinubdan sa buto sa armas , nasuta niini nga ang mibato sa ilang balay mao ang suspek. Apan dihang iya kining giduol ug gibadlong mihiwasa kini sa kasuko nga misangpot sa ilang pagsinumbagay. 

Ang suspek nga gilupig sa hinapakay sa kumo milanit sa iyang kutsilyo ug gihansak sa nagkalainlaing bahin sa lawas sa biktima. Apan bisan samaron, nakadagan pa ang biktima ug mikuha og kutsilyo sa ilang balay.

Gigukod kini sa suspek kay buot tiwasan dihang miatubang kini kaniya dayon misumbalik og hansak sa iyang kutsilyo ngadto sa suspetsado. Apan mas daghan og samad nga naangkon ang biktima kay naunhan man kini.

Ang mga silingan kinsa nabalaka nga may mabugtoan sa kinabuhi sa duha, mitawag og polis busa naabtan sa kapolisan ang duha nga pulos na mga samaron ug dungan kining gihatod sa tambalanan. Ang kapolisan nakapunit   sa nahitaboan og duha ka kutsilyo nga gipanag-iya sa biktima ug suspek ,ug usa ka teargas nga wala hisayri kun kinsay tag-iya niini.

Nahibaw-an sa kapolisan nga ang biktima ug ang suspek dugay nang nagdumot . (BANATNEWS)