CEBU, Philippines - Gipangita na karon ang tindero og isda nga mibunal og dos por dos nga kahoy sa usa ka membro sa task force didto sa sitio Molave, barangay Tabunok, dakbayan sa Talisay sa miaging Lunes aron maimbistiga. Kini ang gibutyag ni Talisay City Administrator Richel Bacaltos sa Banat News kagahapon kinsa nagkanayon nga giawhag nila ang biktima nga magpa-blotter ngadto sa polis bahin sa nahitabo kaniya.
Matud ni Bacaltos nga wala motahod sa balaod ang suspetsado kay ang biktima kinsa usa ka miyembro sa anti-sidewalk vending taskforce igo lang mituman sa kamanduan sa siyudad ngadto kaniya.
Ang maong kaso atua na karon sa buhatan sa city legal officer kinsa maoy gisangonan sa pagpahigayon og imbestigasyon alang sa legal nga aksiyon nga ipatuman batok sa suspetsado.
Ang suspetsado kinsa nailhan lang nga “Ricky” wala na magpakita human kini makabunal kang Lim.
Si Bacaltos midugang nga ang taskforce una motuman sa ilang katungdanan gipaubos kini sa seminar ug gitudlo kanila ang hustong paagi sa pagbadlong nila sa mga vendor.
May katahap si Bacaltos nga nagmagahi ang suspetsado sa pagtuman sa mando sa biktima nga namatud-an sa iyang pagsukol niini.
Sa laing bahin, si Superintendent Eddie Recamara, hepe sa Talisay City Police Station nagkanayon nga may gidestino na siyang upat ka mga polis nga gipangunahan ni SPO3 Archimedes Judilla nga mobantay sa mga sakop sa task force nga mamadlong sa mga vendor sa Tabunok.
Ang task force magsugod sa ilang operasyon gikan sa alas 2:00 sa kaadlawon ngadto sa alas10:00 sa buntag ug gikan usab sa alas 2:00 sa hapon ngadto sa alas 10:00 sa gabii.
Matud ni Recamara nga gawas sa mga polis nga mobantay sa task force, may idestino pa siyang laing team nga magpatrolya matag karon ug unya sa Tabunok.
Mahinumdoman nga human hapsi sa suspetsado og dos por dos ang buko-buko ni Lim, wala kini ikasumbong ngadto sa kapolisan busa wala ma-blotter ang maong hitabo. (BANATNEWS)