CEBU, Philippines - Mokabat sa 341 ka kahong isdang giingong nakuha pinaagi sa illegal fishing ang gisakmit sa kagamhanan sa probinsiya kagahapon diha sa highway sa lungsod sa Carmen ug Catmon.
Ang maong mga kinahong isda gikarga sa usa ka six-wheeler truck ug nakompiska kini sa Team Eskina sa Cebu Provincial Anti-Illegal Fishing Task Force.
Ang team leader sa grupo nga si Oscar Barcenas nagkanayon nga ang maong mga isda mga dagko ug mahalong klase ug gibanabanang mokantidad og P2 milyones.
Gibutyag ni Barcenas nakadawat sila og report bahin sa trak nga nagkarga og mga isdang pinabuthan (gidinamita) nagbiyahe gikan sa lungsod sa Bantayan Island paingon sa Pasil Fish Market sa dakbayan sa Sugbo.
Gawas sa task force, ang Marine Industry Authority-7, 78th Infantry Battalion, ug fish examiner gikan sa Bureau of Fisheries and Aquatic Resources-7 ang milangkob sa maong operasyon.
Mga alas 7:00 sa buntag kagahapon ang grupo mipahunong sa six-wheeler truck nga nagtangag sa plakang GXJ-961 nga dunay kargang 202 ka mga kahong nagkalain-laing klase sa isda sama sa Rompe Candado o Barracuda, Solid, Mamsa ug Lanhoan.
Ang mga fish examiner nga sila si Arlene Baylosis ug Rodillo Codilla nagkanayon nga 100 porsiyentong pinabuthan ang maong mga isda tungod kay nangabungkag na ang ilang ginhawaan. Laing truck usab nga nagtangag sa plakang GXJ-960 nga nagkarga sa 240 ka mga kahong isdang pinabuthan ang na-intercept duha ka oras ang milabay diha sa barangay Panalipan, Catmon.
Matud ni Barcenas nga usa ka gihinganlan og “Bogs” ang giingong shipper sa mga isdang pinabuthan nga gituohang gikan sa Palawan.
Ang mga drayber sa truck giingong dili apilon sa pagpatubag sa mga kalapasan. Ang matag kahon sa maong mga isda nagkantidad kini P4,000 ug giingong ang maong presyo mo-triple inig-abot diha sa merkado.
Si Gobernador Gwendolyn Garcia nagkanayon nga ang kagamhanan sa probinsiya seryoso sa kampaniya batok sa illegal nga pagpangisda.
“This should again send a loud signal to those who continue to flaunt or violate the existing law. We are serious in our campaign against illegal fishing and violators will be relen
tlessly pursued,” ni Garcia pa.
Ang mga isdang naimbargo gipang-apod-apod ngadto sa nagkalain-laing tunghaan ug charitable institutions. (Uban sa report ni Niña J. Sumacot sa The Freeman/EIM)