CEBU, Philippines - Gikumpirmar sa City Social Worker Officer sa dakbayan sa Naga nga si Delia Tibay nga anaa na sa kustodiya sa Department of Social Welfare and Development (DSWD) ang upat ka mga bata kansang mga ginikanan gipamusil patay niadtong Domingo sa kaadlawon diha sa ilang pinuy-anan sa sitio Buyo sa barangay South Poblacion sa dakbayan sa Naga.
Si Tibay nga nahinabi sa Banat News sa iyang buhatan nagkanayon nga nakasabot ra ang apohan sa mga bata nga nagpangidaron 9,7,5 ug 2-anyos hinungdan nga gitugyan na niini sa DSWD ang iyang upat ka mga apo.
Sa nasayran si Lilia Sanger, inahan sa gipatay nga si Marjilly, 28, mibutyag nga dili niini itugyan sa DSWD ang upat niya ka mga apo tungod kay dili niya kini pasagdan sa pag-atiman. Apan giinsister gyud sa DSWD nga matabangan ang mga bata ug ila kining girekomendar og psychological shelter ug tabangan nga makakuha og birth certificates.
Ang siyudad sa Naga pinaagi ni Mayor Valdemar Chiong mitunol na og P27,500 alang sa burial ug financial assistance sa pamilya, samtang transportation ug food allowance alang sa mga bata ang gihatag sa DSWD.
Apan gidugang niya nga sa pagkakarun dili pa gyud makig-estorya ang mga bata sa mga social worker. “Makita gyud nimo nga naay trauma, sige’g hilak ang 9-anyos ug ang youngest,” nagkanayon si Tibay.
Matud ni Tibay nga dili pa sila makaingon hangtud kanus-a nila mahatag ang tabang ngadto sa mga bata samtang sila giabagan sa mga sakop sa National Community for Indigenous People.
Ang amahan sa mga bata nga si Junie nga usa ka traysikad drayber, gituohang mao gyud ang tuyo sa mamumuno apan human siya gipusil, gisunod dayon ang iyang asawang si Marjilly hinungdan sa ilang kamatayon.
Gawas sa pagkamananambal sa asawa, laing motibo nga gisubay karun sa kapulisan ning nagpadayong imbestigasyon mao nga posibleng dunay kalambigitan sa ginadiling drugas. (BANATNEWS)