CEBU, Philippines - Usa ka bana nga miunay pagpatay sa iyang kapuyo niadtong Martes sa buntag, niana nang pagkagabii sa maong adlaw mitahan sa kapolisan. Si Ronnie Caparida, 29, lumad nga taga San Carlos City, Negros Occidental, miangkon nga aksidente niyang napusilan patay ang iyang kapuyo nga si Alicia Revealde, 42, sulod sa giabangan nilang balay sa barangay Capitol Site, dakbayan sa Sugbo.
Matud ni Sr. Inspector Jul Mohammad Jamiri, hepe sa homicide section sa (CCPO) ang pagpusil nahitabo niadtong Martes pasado alas 11:00 sa buntag apan na-report sa ilang buhatan niana nang alas-8:00 sa gabii sa maong adlaw.
Si Caparida kasamtangang gibalhog sa detention cell sa CCPO ug gipaabot nalang ang pagpasaka og tukmang kaso batok kaniya.
Sumala pa sa kapolisan ang igsuon sa suspek nga si Macario maoy mipahibalo kanila nga mosurender ang iyang igsuon.
Dihang giadto sa kapolisan ang giabangan nilang balay sa sitio Ponce barangay Capitol Site, niadtong Martes sa gabii, ilang naabtan ang biktima nga wala nay kinabuhi.
Si Revealde kinsa samdan sa tuong tampihak nga gituohan sa kapolisan nga gidul-itan kini sa armas, lumad nga taga barangay Maluray lungsod sa Dalaguete. - BANAT NEWS