CEBU, Philippines - Matuman na ang dugay nang gidamgo ug gipangandoy sa katawhan sa lungsod sa Tabuelan nga makaangkon og klarong sistema sa patubig ang siyam ka mga barangay sa maong lungsod.
Kini human pirmahe ni Gobernador Gwendolyn Garcia uban ni Tabuelan Mayor Rex Casiano Gerona ang Memorandum of Agreement (MOA) alang sa pagtukod og water system nga mokantidad og kapin sa P19 milyones alang sa siyam ka mga barangay sa nahisgotang lungsod.
Nipirma isip saksi sa pagpirma sa maong MOA sila si 4th district Congressman Benhur Salimbangon; si 4th District Board Member Benjun Mondigo Jr., ug Sun Shimura, Medellin Mayor Recardo Ramirez ug konsehal Danny Diamante sa lungsod sa Tuburan.
Unang makabenepisyo sa maong proyekto mao ang mga bukirang barangay sa lungsod nga gilangkoban sa mga sitio sa barangay Tabunok, Olivo, Tigbawan, Maravilla, ug Kanlim-ao.
Gilauman usab nga mahilakip unya sa serbisyo sa maong patubig ang laing upat ka barangay sama sa Kantobaon, Kanluhangon, Mabonao ug Villahermosa.
Gawas sa proyekto sa patubig, gitunol usab sa gobernador ang duha ka mga tseke nga nagkantidad og P1.3 milyones alang sa pagpabarog og Birthing Center ug laing tunga sa milyon ka pesos alang sa road repair sa nahisgotang lungsod.
Atol sa maong kalihokan gipasabot sa gobernador ang katuyoan sa iyang pagduaw ug pagpirma sa MOA alang sa patubig sa maong lungsod.
Tungod niini, mapasalamaton usab kaayo si Mayor Gerona ngadto sa gobernador nga mihatag gayud sa dugay na nilang gidamgo nga klarong sistema sa patubig sa ilang lungsod.
Nasayran nga una nang gipahatod sa gobernador ang kagatosan ka mga tubo sa tubig ngadto sa Tabuelan aron dili malangay ang pagtrabaho sa water system project sa probinsiya alang sa nahisgotang lungsod. - BANAT NEWS