CEBU, Philippines - Gidudahang tungod sa pag-ilogay sa usa ka babaye nga ilang gihigugma usa ka tanod ang mipusil patay sa 32-anyos nga ulitawo nga iyang karibal diha sa barangay Prenza sa lungsod sa Balamban niadtong Lunes sa alas 5:35 sa gabii.
Ang biktima nga patay nang nadangat sa tambalanan mao si Tito Raplisa alyas Potot, 32, ug nagpuyo sa maong lugar apan lumad nga taga Talamban siyudad sa Sugbo.
Samtang ang gitumbok nga suspek mao si Jeffrey Artajo alyas Eploy, 30, ug tanod sa maong lugar. Matud ni PO1 Rodney Cambarijan sa Balamban Police Station dihang nahinabi sa Banat News ang biktima ug ang suspek una nang nagkalalis tungod sa usa ka babaye nga gihulagway nga ilang giilogan.
Atol sa hitabo ang biktima nakig-inom sa iyang mga barkada sa pinuy-anan sa usa ka Neil Oumento, 34, nagpuyo sa maong lugar apan ang suspek giingong sekretong misaka sa luyong bahin sa maong balay ug way daghang estorya gipusil si Raplisa.
Naigo ang biktima sa dughan ug nahagba kini ug dihadiha misibat ang tanod . Ang mga gikainom sa biktima mao nay midala kaniya sa Balamban District Hospital apan gideklarar kini nga dead on arrival (DOA).
Ang suspek boluntaryo hinuong mitahan sa iyang kaugalingon.
Nasuta usab sa imbestigasyon nila ni SPO3 Arvie Banate, nga si Raplisa nag-antos sa sakit sa pangisip nga giingong kalit lang mosuol ug usa sa posibleng hinungdan sa krimen.
“Duna man pud kuno ni siya’y deperensiya gamay nga mukalit la’g sugmat,” matud pa ni Banate sa interbyu sa telepono.
Apan si Artajo dihang gikuhaan sa iyang habig miingon nga sayo pa niadtong Domingo nagkalalis na silang duha sa biktima nga nahusay ra pagkahapon, apan pagkasunod adlaw nakadawat siya og text gikan sa biktima nga dunay dautang tuyo kaniya.
“Wa ko kahibaw unsa akong sala niya nga iya man kong pasingitan,” matud pang Artajo kinsa mibutyag nga wala siya masayod kung dunay relasyon si Raplisa sa babayeng iyang gipanguyaban
Dihang nag-abot sila niadtong Lunes diha na mahitabo ang pagpamusil. (BANAT NEWS)