CEBU, Philippines - Ang kagamhanan sa dakbayan sa Talisay naglaraw na sa hingpit nga pagpatuman sa balaod nga magdili sa paggamit og plastic bag.
Kini samtang usa na ka tuig ang gidugayon nga natanggong ang pagpatuman sa maong balaod human kini aprobahe sa konseho sa maong dakbayan niadtong miaging tuig.
Si Konsehal Bernard Odilao sa maong dakbayan naglaraw nga ang maong balaod una nilang ipatuman sa Lagtang Public Market.
Si Odilao kinsa maoy chairman sa committee on environment sa konseho sa Talisay miingon nga ang Anti-Plastic Bag Ordinance sa siyudad labing sayon nga ikapatuman sa nahisgutang merkado sa Lagtang tungod kay ang maong lugar iyaha man sa lokal nga kagamhanan.
Ang mga manindahay sa maong merkado pweding magsugod na og gamit og mga paper bag nga maoy pustan sa ilang mga baligya kung adunay mopalit.
Si Odilao mibutyag nga gipadayag na niya kang City Administrator Richel Bacaltos ang maong ideya ug si Bacaltos misaad kaniya nga makigtagbo sa mga vendor aron ipahibawo kanila ang pagpatuman sa maong ordinansa.
Ang maong ordinansa nga nagdili sa paggamit og mga plastic bag sa tanang mga commercial shop naaprobahan sa konseho niadtong buwan sa Pebrero sa milabay’ng tuig.
Si Konsehal Rodi Cabigas kinsa maoy nangamahan sa maong balaod nagkanayon nga tumong niini mao nga maiban-ibanan ang basura sa siyudad ug dili na usab maghuot ang mga kanal nga maoy mahimong hinungdan sa lunop sa panahon sa ting-uwan.
Ang mga plastik maoy usa sa hinungdan sa pagkabara sa mga kanal kay dugay kining mahilis. Si Cabigas miawhag sa paggamit sa mga green bag imbes plastic bag. (BANAT NEWS)