CEBU, Philippines - Nadagit sa mga tulisang de motor ang P10,000 nga kuwarta nga ilang gitulis gikan sa usa ka ahente sa softdrink didto sa barangay Guiwanon, lungsod sa Argao niadtong Lunes sa alas 3:10 sa hapon.
Ang biktima mao si Antonio Panerio Giallon, 38 , minyo, ug drayber/salesman sa Kritzland Marketing nga nahimutang sa Kankainab, Argao ug supplier sa mga softdrink.
Si PO2 Manuelito Abrinica sa Argao Police Station mibutyag sa Banat News nga naghatod niadtong tungora ang biktima og mga softdrink sa Ongking Store sa maong lugar. Apan dihang gitunol na kaniya ang P10,000 nga bayad sa tag-iya sa tindahan kalit kaayong mihunong sa atubangan sa biktima ang usa ka motorsiklo nga walay plate number nga gisakyan sa duha ka wala hiilhing mga tawo.
Dayon ang angkas sa luyo maoy mition og armas ngadto sa biktima uban sa pagdeklarar nga tulis dayong labni sa kuwarta nga bag-o pang nadawat niini nga bayad sa gihatod niyang mga softdrink.
Ang biktima nga gisanapan sa kahadlok wala makatingog ug wala makasukol busa yano kaayong nadagit sa tulisan ang iyang kuwarta. Gumikan sa kasirado sa helmet nga gisul-ob sa mga tulisan walay nakaila niini sa maong lugar.
Ang biktima igo nalang nagpa- blotter sa nahitabo kaniya didto sa buhatan sa kapolisan sa maong lungsod.
Samtang padayon karong gipangita sa kapolisan ang mga tulisan.(/WC)(BANAT NEWS)