Nagbinasolay sa kalangay paghatag sa allowances sa mga iskolar

CEBU, Philippines - Tungod sa nahitabong kagubot ug kalangay sa paghatag sa cash assistance sa mga iskolar sa siyudad sa Sugbu niadtong milabay’ng semana naglaraw ang executive department nga sila nay mopreparar sa masterlist sa mga tinun-an, kini human nagbinasolay ang isi’g ka departamento sa siyudad kun si kinsa ang nakaingon sa aberya. Ang plano anha na kini ipaagi sa Local School Board kinsa mao nay moapod sa P1,000 school supplies allowance sa mga tinun-an imbes sa kasamtangang buhatan ni Bise Mayor Joy Augustus Young nga maoy nagdumala.

Sumala pa sa pangulo sa school board nga si Dr. Ester Cubero nga ang usa ka rason kung nganong nagkagubot ang distribusyon sa financial assistance sa maging semana mao ang wala mahan-ay nga masterlist sa mga pangalan sa scholars.

Gihimakak usab ni City Treasurer Ofelia Oliva ang report nga wala nila maandam ang cash assistance alang sa mga scholars tungod kay ang gibasol nila mao ang walay klarong listahan sa mga iskolar. Si Young mibasol usab kang Mayor Michael Rama tungod kay midiskurso pa kini sa wala pa sugdi ang pagpanghatag sa allowances maong nalangay og samot ang distribusyon, misugyot si Young nga adto nalang sa mga tunghaan sa matag iskolar ipangtunol ang mga allowances aron walay mahasol. (BANATNEWS)