Drayber sa habalhabal gipatay

CEBU, Philippines - Patay ang usa ka habalhabal driver ug laing usa ang anaa sa talandugong kahimtang sa duha ka nagsunod nga pagpamusil sa managlahing lugar sa lungsod sa Consolacion niadtong Domingo sa alas 8:35 sa gabii.

Ang namatay mao si Clifford Quiapo, 30, molupyo sa barangay Lamac sa lungsod sa Consolacion ug usa ka habal habal drayber human duha ka wala mailhing lalaking luwan og motorsiklo ang giingong kalit nga mipusil kaniya.

Matud ni PO3 Allen Garciano sa Consolacion Police Station dihang nahinabi sa Banat News mi-overtake ang mga mamumuno sa motorsiklo sa biktima ug angkas niini maoy mipusil kang Quiapo gamit ang wala matinong kalibre sa armas ug naigo sa ulo ug lawas ang biktima.

Human niini daling misibat ang mga gikatahapan samtang ang biktima nga natumba uban sa motor nakabsan sa kinabuhi.

Samtang nianang pagka alas 11:10 sa udto sa samang adlaw laing pagpamusil ang nahitabo sa barangay Tugbungan sa mao gihapong lungsod diin usa ka Gilbert Antolihaw, 38, nagpuyo sa maong lugar maoy nabiktima. Usa ka Joel Tomungha nga nagpuyo sa maong lugar ang gitumbok nga mipusil sa biktima.

Matud ni PO2 Roosevelt Matuog sa Consolacion Police Station dihang nahinabi sa Banat News subay sa inisyal nga imbestigasyon ang biktima samtang naglakaw kalit kining gihunongan sa suspek nga nagsakay og motorsiklo nga Honda XRM dayon giingnan ang biktima, “buanga nimo bay!” dayong bunot sa armas nga wala matino ang kalibre ug pusil sa biktima ug naigo sa tiyan. Pagkahuman misibat pahilayo ang suspek sakay sa motor niini. Ang duha ka kaso gihimoan na og imbestigasyon sa kapolisan.(/EIM) (BANATNEWS)