Buhing Kalbaryo 2012 gipangandaman

CEBU, Philippines - Subling ilusad sa kagamhanan sa syudad sa Sugbo sa ika-15 ka higayon ang tinuig niining kalihukan matag Biyernes Santo nga Buhing Kalbaryo.

Sa press conference nga gipahigayon kagahapon, gipahibalo sa director niini nga si Archie Modequillo nga andam na ang mga entrante sa maong kalihukan kinsa nagsugod na sa ilang pagbansay niadtong unang semana karong buwana.

Sumala pa ni Modequillo usa kini ka buhing paghulagway sa pasyon ug kamatayon ni Hesu-Kristo diin mokabat dul-an sa 200 ka mga kabatan-onan gikan sa Barangay San Nicolas Proper, Calamba, Guadalupe, Kalunasan ug Buhisan ang mosalmot niini.

Si Mayor Michael Rama misaysay nga tumong sa maong programa mao ang paghandom sa katawhan sa mga kaagi ni Kristo ug magpabilin usab ang tradisyon.

Naandan na kining anha manukad sa San Nicolas Parish Church ug isunod dayon ang Via Cruces ug ang dula matapos sa Parokya sa Mahal nga Birhen sa Guadalupe.

Nasayran nga kasagaran sa mga entrante ang taud-taud nang miapil sa maong pasundayag sama kang Gleen Ryan Ryan Cadalzo kinsa 11 na ka tuig nga misalmot sa Buhing Kalbaryo ug siya maoy midala sa papel nga Jesus karong tuiga.

Gihulagway sa mga organizers niini nga maisip nang usa ka tourist attraction ang Buhing Kalbaryo sa dakbayan sa Sugbu ug ilahang gilauman nga magbaha ang mga turista ang mangabot sa Sugbo alang sa maong kalihukan.  - BANAT NEWS