2,000 KAABAG nanglimpiyo sa Mandaue

CEBU, Philippines - Mikabat og kapin sa 2,000 ka mga sakop sa KAABAG, Inc ang nanglimpyo sa dalan U.N. Ave., lahos sa Pajara Park sa ilawom sa Marcelo Fernan bridge ug misaksi usab sa usa sa labing dako nga boodle fight sa miaging adlaw.

Ang maong kalihokan maoy kabahin   pagsaulog sa ika-lima ka tuig nga anibersaryo sa Ang KAABAG Inc., usa ka non-government organization (NGO) nga gitukod ni Mayor Jonas Cortes aron sa paghimo og mga community projects.

“Dako ang akong pasalamat kaninyo, opisyales ug sakop sa pagpraktis sa hiyas sa volunteerism,” ang mayor miingon ngadto sa Kaabag members human sa boodle fight.

Siya midugang nga ang gihimo sa grupo labing makaayo sa kalikupan.

Misalmot sa   maong kalihokan ang mga nagkalain-laing barangay-based sectoral organization sama sa women’s group, persons with disabilities (PWD), youth, Manpride, kapunongan sa mga homosexuals ug uban pa.

Matud ni Engr. Emeterio Cabilao, presidente sa KAABAG, nga giandaman nila og 2,500 ka puso nga gipakaon ngadto sa mga misalmot sa maong pagpanghinlo nga gigastohan sa kagamhanan sa dakbayan og kapin sa P20,000.

Ang pagkaon sa boodle fight naglangkob og uyap, humba, ug fried chicken.

Misalmot usab sa maong kalihokan si Madame Sarah Walker-Cortes, asawa sa mayor ug ang mga kapitan sa barangay.

Ang kasaulogan gisugdan sa miaging Lunes sa usa ka libre nga masahe sa mga PWD nga sakop sa Kaabag, gisundan sa libreng tupi sa pagka-sunod adlaw, dayon cooking demo ug disaster preparedness lecture.  - BANAT NEWS