Nag-inom gipusil patay sa kontra

CEBU, Philippines - Usa ka tawo ang namatay human kini pusila sa kauban sa   grupo nga ilang gikarambola didto sa dalan Soriano sa barangay Carreta ning dakbayan sa Sugbo pasado alas 12:00 sa tungang gabii.

Ang biktima nailhan nga si Artemio Casipong, 34, nga taga barangay Supangdako, syudad sa Mandaue.

Samtang ang suspetsado nailhan lang sa ngalan nga Bernard nga taga sitio Mahayahay, barangay Carreta.

Sa pasiunang imbestigasyon sa kapolisan nasayran nga ang biktima ka- inom sa iyang mga higala sa usa ka tindahan nga nahitaboan.

Apan sa ilang panag-inom kalit lang miabot ang grupo sa suspetsado ug diha-diha midasmag sa grupo sa biktima nga maoy sinugdanan sa lamok-lamok nga sinumbagay.

Unya sa kalit lang milanog ang usa ka buto sa armas de fuego kansang bala mitaroy sa buko-buko sa biktima.

Human malup-og sa yuta ang biktima nga gidunganan usab sa pagbuhagay sa daghang dugo niini, mialibwag og dagan ang grupo sa suspetsado pahilayo sa maong lugar.

Gihatud dayon ang biktima sa iyang mga kauban ngadto sa Vicente Sotto Memorial Medical Center (VSMMC) diin kini ideklarar nga dead on arrival.

Padayon pang gipangita sa kapolisan ang suspetsado ug mga kauban niini.  - BANAT NEWS