Seawall sa tangke gi-inugorahan

CEBU, Philippines - Human manghatag og gasa si Gobernador Gwendolyn Garcia sa lungsod Minglanilla taliwala sa naglagiting nga kainit sa adlaw, miadto na usab sa Sitio Magay, barangay Tangke, dakbayan sa Talisay ug gi-inagurahan ang usa ka kilometro nga seawall sa maong dapit sa miaging adlaw.

Mitambong usab sa maong inagurasyon sila si Provincial Board Member Teban Daan ug Serie Restauro ug mga opisyal sa dakbayan sa Talisay nga gipangulohan ni Mayor Socrates Fernandez ug mga Barangay Official sa barangay Tangke nga gipangulohan ni Kapitan Perla Cabanes.

Sa iyang pagpamulong, ang gobernador misaysay sa mga taga-Tangke sa iyang mga biyahe sa nakalabay nga mga adlaw diin napupo niya ang talagsaong kalipay tungod sa mainitong pagdawat ug paghangop sa mga molupyo sa maong dapit   nga iyang gibisitahan.

Ang gobernador midayeg usab sa gibawos nga pagmahal sa katawhan sa Tanke sa iyang nahimong proyekto nga seawall uban sa pagpakigtambayayong sa mga sakop sa hunta probinsyal sa Sugbo ug sa lokal nga kagamhanan sa dakbayan sa Talisay.

Matud pa sa gobernador nga iyang gihimo ang maong proyekto sanglit naghatag kini og seguridad sa kinabuhi, panginabuhi ug kabtangan sa mga taga Tangke.

Ang kagamhanan sa lalawigan mihatag og 4 mil ka sako nga semento sa maong proyekto.

Sa samang higayon gipahibawo ni Governor Garcia nga iya usab nga ipatrabaho uban ni mayor Fernandez ang seawall sa Sitio Rattan ug sitio Lawis sa barangay Tangke.

Sila si Kapitan Cabanes sa Barangay Tangke ug si Mayor Fernandez mipalanog usab sa ilang mga pasalamat sa gobernador. (BANAT NEWS)