Usa sa top ten nga drug pusher sikop

CEBU, Philippines - Nadakpan sa kapolisan ang usa sa top ten nga mga notadong drug pusher   sa lungsod sa Bantayan sa Bantayan Island niadtong Biyernes sa alas 12:30 sa kaadlawon.

Ang nasikop mao si Ernesto Cordova, 28, ulitawo, nga nagpuyo sa maong lugar.

Nasakmit gikan kaniya ang 4 ka paketing pinulbos nga kemikal nga gituohang shabu ug ang P300 nga buy- bust money.

Si PO2 Roberto Rondina sa Bantayan Police Station mibutyag sa Banat News nga ang suspetsado nasikop nila pinaagi sa buy-bust operation.

Kini human sila makadawat og taho nga ang suspek kinsa dangog ug idlas kaayo mipundo sa ilang balay sa maong higayon samtang namaligya og shabu.

Pinaagi sa usa ka poseur buyer nga polis kinsa maoy mipalit og usa ka pakite nga shabu sa suspek giposasan dayon kini human modawat sa P300 nga marked money nga silbing    bayad sa drugas.

Misuway pa unta og lugnot ang suspetsado apan wala kini makalingkawas gumikan sa kaabtik sa back up sa kapolisan nga maoy mi-corner kaniya.

Gawas sa usa ka paketi sa shabu ug P300 nga marked money nakakuha pa gyud ang kapolisan og laing 3 ka paketi nga shabu sa tuong bulsa sa suspetsado dihang girekisa kini.

Ang   maong suspek nagtingkagol na karon sa karsel ug gitakdang pasakaan og kaso ugmang adlawa .

Si Cordova usa sa 10 ka tawo   nga anaa   sa watchlist order sa kapolisan gumikan sa pagpayuhot og gidiling drugas didto sa Bantayan. (BANAT NEWS)