Lola gidasmagan sa motor kritikal

CEBU, Philippines - Kritikal ang kahimtang sa 80-anyos nga lola human madasmagi sa motorsiklo sa iyang paglabang sa karsada didto sa Sitio Busa, barangay Madridejos, lungsod sa Alegria niadtong Biyernes sa alas 9:00 sa buntag.

Ang biktima mao si Dionisia Elnar, 80, biyuda ug nagpuyo sa maong lugar.

Samtang ang nakadasmag kaniya mao ang Honda TMX 155 nga dunay temporary plate number nga PD 7626 nga gimaneho ni Emrito Glenogo, 27, minyo, ug nagpuyo sa Sitio Cabugan, barangay Guadalupe, Alegria.

Si SPO4 Rutillo Cardona, imbistigador sa Alegria Police Station mibutyag sa Banat News  nga ang biktima naglakaw sa karsada apan wala makabantay sa nagbagiyos nga motorsiklo paingon kaniya hinungdan nga nadasmagan siya kay wala man usab makabantay ang drayber sa kalit niyang paglabang.

Misaliring ang biktima ug maayong pagkamudmod ang nawong sa karsadang sementado ug nahiagom sa mga pangos ug mga bun-og ang kalawasan.

Dali siyang gihatod ngadto sa Reinhard Wertgin Memorial Hospital sa lungsod sa Alegria apan gibalhin kini sa tambalanan sa dakbayan sa Sugbo ubos sa talandugong kahimtang.

Samtang ang suspetsadong drayber sa motor boluntaryong mitahan sa iyang kaugalingon ngadto sa kapolisan ug kasamtangang nabalhug sa prisohan samtang gihikay ang kasong ipasaka batok kaniya ugma, Lunes. (BANAT NEWS)