CEBU, Philippines - Usa ka gidudahang notadong drug pusher ang nasikop sa mga sakop sa Provincial Intelligence Branch (PIB) sa syudad sa Danao lakip na ang gitudlong supplier niini sa duha ka adlaw nga operasyon sa managlahi nga lugar.
Ang mga nasikop mao silang Reyfrando Quiñones Danlag alyas Danlag ug Elnathan Froilan Parel alyas Tanny.
Pasado alas-6 niadtong Biyernes sa gabii, ang mga sakop sa PIB pinanguluhan ni Sr. Insp. Mark Gifter Sucalit mipahigayon og buy-bust operation sa Beatriz-D. Durano St., Poblacion, syudad sa Danao nga ang target mao ang usa ka ginganlan og “Danlag” nga giingong maoy namaligya og nubain sa maong lugar.
Usa ka poseur buyer ang mipalit og usa ka nubain sa kantidad nga P170 gikan ni Danlag ug dihang nagtunolay na ang duha dali kining gisikop.
Nakuha gikan kaniya ang usa ka ampule nga gituohang adunay sulod sa nubain; usa ka disposable syringe; dugang 35 ampules nga gituohang may sulod nga nubain nga gisulod usab sa plastic containers; 15 ka basiyo sa ampules; 9 disposable syringes; P170 nga buy-bust; cellphone ug usa ka itom nga belt bag nga giingong gisudlan sa mga nakuhang ebidensya.
Human madakpi si Danlag, mitug-an kini si kinsa ang nagsuplay kaniya sa maong ilegal nga drugas nga miresulta sa pagkasikop ni Parel diha sa usa ka sikat nga mall sa Reclamation Area sa barangay Mabolo, sa dakbayan sa Sugbu pinaagi gihapon sa usa ka buy-bust operation.
Nakuha gikan ni Parel ang 25 ka boxes nga adunay sulod nga 250 ka ampules nga nubain; P500 bill nga buy-bust money ug usa ka cellphone. Matud pa ni Sucalit nga nahinabi sa Banat News nga tulo sila ka semana nilang giyak-an ang maong operasyon tungod sa mga nadawat nilang reklamo batok ni Danlag. (BANAT NEWS)