Ginang gitulis ug gigapos apan 2 tulisan nadakpan

CEBU, Philippines - Nadakpan sa kapolisan ang duha ka suspetsadong tulisan nga giingong migapos ug mibaat sa baba sa babayeng ilang gitulis sa sulod sa gipuy-an niini sa La Aldea del Rio Subdivision sa barangay Calawisan, dakbayan sa Lapulapu sa miaging gabii.

Ang nadakpan mao sila si Jaypee Gitgano Baguio, 18, ug Rey An Solomon Gingoyon, 22, nagpuyo sa Zone Litob sa barangay Calawisan sa mao gihapong dakbayan.

Si PO1 Junnel Mayola sa kapolisan sa Presinto 3 sa Lapulapu City Police Office (LCPO) nga nahinabi sa Banat News miingon nga ang biktima nga si Emma Tirado, 18, miila sa mga suspetsado pinaagi sa mga police rogues gallery nga mga badlungon sa maong lugar.

Tungod sa pag-ila sa biktima daling nadakpan ang duha sa ilang mga balay sa barangay Calawisan.

Matud pa ni Mayola, ang biktima miasoy nga nagluto siya sa ilang panihapon dihang kalit lang nga misulod sa ilang panimalay ang duha ug gitionan siya og kutsilyo dungan ang pagdeklarar nga tulis.

Ang biktima adunay 2-anyos nga anak lalaki nga nahinanok og katulog sa sulod sa ilang lawak dihang nahitabo ang pagpanulis. Gikuha sa duha ang digital nga camera nga nagkantidad og P30,000 ug salaping P2,000.

Ang biktima mitug-an nga tungod sa kahadlok nga dunggabon sa duha ka tulisan wala na siya mosukol hangtod nga gibaatan siya og packaging tape sa baba ug gigapos og pisi iyang kamot ug mga tiil.

Human niini mibiya ang mga tulisan sa ilang balay diha agi sa luyo sa kural sa ilang balay pinaagi sa pagkatkat ug pag-ambak gawas na sa subdivision. (BANAT NEWS)