CEBU, Philippines - Si Konsehal Bernard Odilao sa dakbayan sa Talisay miawhag sa mga residente niini ug sa mga tagdumala sa mga commercial establishment nga mosalmot sa ipahigayong Earth Hour karong Marso 31, 2012.
Matud ni Odilao nga gikinahanglan kaayo ang pagpakabana sa publiko niining maong gimbuhaton sa pagdaginot sa kuryente hinungdan nga ilang giawhag ang mga commercial establishment sa pagsalmot niini.
Ang Earth Hour saulogon sulod sa usa ka oras pinaagi sa pagpawong sa mga sugang dagitabnon sa matag panimalay.
Niadtong Martes sa buntag atol sa regular nga sesyon sa konseho sa siyudad giaprobahan ang gidusong resolusyon ni Odilao kalabot niini.
Ang maong resolusyon nag-awhag sa mga opisyal sa goberno, kawani ug sa tanang organisasyong pampubliko ug pribado sa pagsalmot sa Earth Hour.
“The issue on climate change has been prevalent in our midst today, such as evident of the number of typhoons that frequent our country which results to flash floods and phenomenon known El Niño has taking it’s toll”, tipik sa resolusyon ni Odilao. Matud ni Odilao nga ang Earth Hour kabahin sa pagpakabana sa kagamhanan sa climate change nga nakaapekto sa kinabuhi sa katawhan sa tibuok kalibotan.
Ang maong kalihokan gipatuman sa nagkalainlaing nasud sa kalibotan diin ang Pilipinas maoy usa ka aktibong misuporta niini.Atol sa pagsaulog sa Earth Hour ang kagamhanan sa siyudad mopahigayon og programa nga mohatag og gibug-aton sa pagpawong sa tanang suga gikan sa alas 8:30 sa gabii ngadto sa alas 9:30 sa gabii. (BANATNEWS)