CEBU, Philippines - Tun-an pa sa piskalya kung kasong murder o ipabiling kasong homicide ang ipasaka batok sa polis nga si SPO2 Cresente Dacillo tungod sa pagpusil patay sa silingang vendor nga si Primo Gallego Jr. diha sa sitio Upper Laguna Ciwac sa barangay Bulacao ning dakbayan niadtong nakalabay’ng Lunes.
Hinuon si Dacillo nga mi-file og waiver of detention human unang gipasakaan og kaso sa Cebu City Police Office, Homicide Section niadtong Huwebes sa hapon gihatagan ni Prosecutor Gandhi Truya og 15 ka adlaw aron mosumitir sa iyang counter-affidavit.
Si Dacillo nga nadestino sa Punta Princesa Police Station sa Cebu City hugtanon nang daan nga mihimakak sumala pa sa mga imbestigador nga iyang gituyo ang pagpatay sa biktima sanglit igo ra siyang nanalipod sa iyang kaugalingon tungod kay armado usab si Gallego.
Si Truya nagkanayon nga ilahang sutaon kung paigo na ba ang kasong gisang-at sa kapolisan nga homicide batok kang Dacillo o kung mapatas-an pa kini ngadto na sa murder, matud pa niya mag-agad pa sila sa mga ebidensyang isumitir unya sa duha ka habig. Una niini, si Sr. Insp. Jul Mohammad Jamiri, hepe sa Homicide Section sa Cebu City Police Office (CCPO) mitug-an sa mga tigbalita nga kasong murder ang ilang ipasaka batok kang Dacillo tungod sa mitungha nga mga testigo, apan sa aktwal nga pagpasaka sa kaso niadtong Huwebes homicide lamang kini. Sa sayo pa niini, ang inahan sa biktima nga si Angelina mikwestyon nang daan nganong homicide ug dili murder ang gipasaka batok sa maong polis.
Matud pa niya nga daghang mga testigong nakakita nga walay armas iyang anak nianang tungora sukwahi sa pamahayag ni Dacillo.
Sumala pa sa mga polis adunay narekober nga .38 kalibre nga may sulod nga unom ka bala diha sa ilawom sa lawas sa biktima.
Giingong mipalit nianang tungora og sardinas ang biktima ug giingong walay gisuot nga pang-ibabaw nga sinina gawas sa gisab-it nga face towel. (BANATNEWS)