'Pusher' nakaipsot sa tunnel

CEBU, Philippines - Usa ka babayeng gipasanginlang ‘drug pusher’ ang nakaipsot sa gipahigayong pagpangronda sa mga sakop sa Philippine Drug Enforcement Agency (PDEA)-7 niadtong Huwebes sa gabii diha sa barangay Sudlon, Lahug, dakbayan sa Sugbo.

Ang suspetsado mao si Teresita “Teray” dela Torre nakaipsot kini tungod kay miagi diha sa tunnel nga tuyong gibuhat gikan sa iyang balay lusot ngadto sa sapa.

Apan ang giingong drug courier ni dela Torre nga si Isagani “Gani” Tito nasikop sa grupo nila ni IO3 Feliciano Bersales inabagan sa Cebu Anti-Illegal Drug Special Operation Task Group.

Si Jessie Tabanao, tigpamaba sa PDEA-7 nagkanayon nga naglisod sila sa pagsikop kang dela Torre tungod sa kahuot sa agianan diha sa lugar ug sa koral nga nagpalibot sa balay sa suspetsado.

Ang poseur buyer nga si IO1 Sisa Cortes daling migunit ug mibunlot sa kamot ni Tito dihang mitunol kini kaniya sa ginadiling drugas bugti sa P300 nga bayad diha sa koral.

Dihang nakuptan si Tito ni Cortes daling midagan si dela Torre ug milusot ngadto sa tunnel sa iyang balay nga 100 metros ang gitas-on paingon ngadto sa sapa.

Matud ni Tabanao nga sirado ang balay sa suspetsado ug duna kini koral ug kung dunay mopalit og ginadiling drugas anha lang kini itunol sa abling bahin sa koral.

Sa gipahigayong pagsiksik sa operatiba sa balay sa suspetsado na-recover ang 103 ka mga gagmay’ng pakete sa shabu nga nagkantidad tanan og P30,900, usa ka dakung pakete sa shabu nga nagkantidad og P35,000, mga linukot nga tinfoil, mga plastic straw nga gamitong taksanan; improvised bamboo clips; plastic container; usa ka rolld nga aluminum foil ug disposable lighter.

Ang operatiba nakadawat og mga report nga ang balay sa suspetsado giingong usa kini ka drug den.

Si dela Torre giingong nahimutang sa level two nga drug pusher kinsa makabaligya og 200 gramos nga shabu nga mokantidad og P1.4 milyones matag semana.

Matud usab ni Tabanao nga nagpahigayon na sila og mga pagpangronda batok kang dela Torre kaniadto apan nakaipsot kini apan nasikop nila ang kapuyo sa suspetsado.

Giingong ang mga shabu nga gipamaligya ni dela Torre naggikan sa dakbayan sa Ozamis ug Manila. (BANATNEWS)