RTWPB mosusi kung dunay rason nga umentohan ang suhulan

CEBU, Philippines - Tun-an pa sa Regional Tripartite Wage Productivity Board (RTWPB)-7 kung aduna bay supervening condition sa Central Visayas nga maoy basehan nga usbon ang Order Number 16 nga mao ang pagpausbaw sa suholan sa mga mamumuo.

Ang supervening condition mao ang pagsaka sa mga presyo sa mga nag-unang palaliton ug di na paigo ang kasamtangang gidawat nga suhulan sa mga mamumuo.

Kahinumduman nga ang Association of Labor Union-Trade Union Congress of the Philippines (ALU-TUCP) niadtong Miyerkules miduso og petisyon alang sa P90 nga wage hike o usbaw sa suholan nganhi sa Central Visayas ngadto sa RTWPB.

Ang gibasehan sa ALU-TUCP sa maong petisyon mao ang padayong pagsaka sa produktong petrolyo, automatic nga adjustment sa rate sa mga panginahanglan ug mga serbisyo nga miresulta sa pagsaka sa presyo sa mga nag-unang produkto.

Si director Maria Gloria Tango sa RTWPB sa pakighinabi niini sa Banat News kagahapon mibutyag nga nagpahigayon og meeting ang board diin gituki nila ang maong isyu.

Matud ni Tango nga gimandoan nila ang secretariat sa pagsusi o pag-update sa National Economic Development Authority (NEDA), Department of Trade and Industry (DTI) ug Bureau of Agriculture Statistics aron mahibaw-an kung misaka ba ang presyo sa mga nag-unang palitonon.

Si Tango mipasabot nga ang wage board dunay gisubay nga polisiya nga dili usbon ang katapusang wage order kung wala pa kini maabti og usa ka tuig.

Kahinumduman nga ang Wage Order Number 16 nga mao ang pagpatuman sa usbaw nga P20 sa minimum wage giaprobahan ug gipatuman niadto pang Septiyembre 22, 2011, unom pa ka buwan ang nakalabay.

Apan matud ni Tango nga dunay exception niini ang maong order, mausab kini kung mapamatud-an nga duna gyuy supervening condition.

Si Tango midugang nga karong Abril 12, 2012 ang sunod meeting sa board diin ipresentar sa secretariat ang resulta sa iyang pakisusi ngadto sa mga nahisgutang ahensiyang hingtungdan. (BANATNEWS)