CEBU, Philippines - Ang konseho sa siyudad sa Sugbo mimando sa Office of the Building Official nga pangtangtangon ang mga streamers nga gitapot lang sa mga kadalanan gumikan kay nakahugaw kini sa siyudad.
Matud pa ni Bise Mayor Joy Augustus Young nga dunay mga streamers ang gipamutang sa mga center islands nga nanglapas na sa petsa busa angayan na kining panangtangon. Nasayran nga ang mga permit nga ipahimutang sa center islands aduna gyu’y permit sa siyudad ug pinasubay kini sa petsa.
"Kung nalapas na siya sa date, angayan na gyud na nga tangtangon aron dili siya samok tan-awon," sumala pa sa bise mayor.
Matud pa ni Young nga aron patas ang tanan, posibleng malakip sa tangtangon ang mga streamers sa apohan ni Mayor Michael Rama nga si Don Vicente Rama. Ang maong streamer gibutang tungod sa selebrasyon sa Charter Day sa siyudad sa Sugbo nga gisaulog sa miagi pang buwan.
Dugang pa niya nga aron dili matawag og bias ang konseho, ipalakip sad sa pagpatangtang ang mga streamers sa Asian College of Technology nga gipanag-iya ni Konsehal Rodrigo Abellanosa.
Nasayran nga nagbaha na ang mga streamers sa maong tunghaan pahibalo alang sa sunod nga pagbukas sa klase.
Hinuon pwede rang butangan og streamers ang mga pribadong establisamento kung kini adunay pagtugot sa tag-iya. (/EIM) (BANAT)