Cuenco modagan sa 2013

CEBU, Philippines - Gikompirmar ni kanhi Kongresista Antonio Cuenco ang mga balitang subli siyang modagan pagka-kongresista sa habagatang bahin sa Sugbo ilawom sa “Team Rama.”

Ang Team Rama gipangulohan ni Mayor Michael Rama ug kapares ni Cebu City Councilor Edgar Labella.

Sa 888 Forum kagahapon sa buntag diha sa Marco Polo Plaza Hotel sa barangay Lahug, si Cuenco maoy usa sa guest speakers sa nahisgtuang forum miingon nga makahatag sila og kasigurohan nga ang mga kandidato nga ubos sa ilang lineup maoy labing kwalipikado sa pagserbisyo ug dunay kaugalingong panghunahuna.

Ang kampo ni Rama duna na silay 20 ka mga kandidato isip konsehal sa south district ug matud ni Cuenco nga sa Oktubre sa filing sa certificate of candidacy (COC) siguradong ang ilang kampo duna nay mapiling walo ka lig-on nga mga konsehal.

“You can be sure that our lineup will be complete and our candidates and councilors are well-qualified for the job and you can be sure that they will not be “tuta” like some, they will independent minded, they can object to resolutions and policies which are not good for the people”, ni Cuenco pa.

Si Cuenco nagkanayon usab nga siguradohon ni Rama nga ang mga miyembro sa konseho mga independente og panghuna-huna ug sa ilang partido walay mahitabong diktadorya.

Si Cuenco nagkanayon nga isip magbabalaod sa taas nga panahon dako kaayo niya kining pabor nga magpasubli pagpapili.

Gibutyag usab sa kanhi kongresista nga nakigtigom siya sa mga kapitan sa south district diin sa 34 ka mga kapitan 30 niini ang mipirma og manifesto nga mosuporta niya ug lakip sa mga mipirma giingong mga sakop sa Bando Osmeña Pundok Kauswagan (BOPK).

Gihugonhugonang ang asawa ni Kongresista Tomas Osmeña nga si Cebu City Councilor Margarita Osmeña ang makaatbang ni Cuenco apan matud pa sa naulahi mas maayong daghan ang modagan aron dunay kapilian ang katawhan kinsa maoy mohukom.

“Everybody is welcome, and I wish them good luck, good health and God bless you Margot,” ni Cuenco pa.

Si Cuenco midugang nga sa iyang panahon sa iyang pagka-kongresista kaniadto ubay-ubay na usab siyang nahimong proyekto sa south district diin uban sa maong proyekto mao ang pagpatukod og mga school buildings, sports complexes, scholarship programs ug medical programs.

Lakip usab niini mao ang pagpatukod sa Mother and Child Hospital diha sa barangay Basak, dakbayan sa Sugbo nga mao karoy usa sa paanakang tambalanan nga ang pundo naggikan sa nasudnong kagamhanan.

Samtang si Rama misaysay nga bisan nga lig-on ang iyang kaubanan, dili gihapon siya mokompiyansa ug wala na usab mohingalan pa sa uban pa niyang kandidato.

 “Basta ako, duna na ta’y Labella, Cuenco ug uban pa, basta surprise na lang ang uban,” matud pa sa mayor.

Matud pa niya nga anam-anamon niya ang pagbutyag sa mga pangalan sa iyang lineup aron masurpresa ang iyang kaatbang. Aminado si Rama nga dunay mga survey nga nag-ingon nga kusog ang iyang grupo apan dili dayon siya malipay niini sanglit mausab-usab ang dagan sa panahon. (BANAT NEWS)