Hangyo sa homeowners gitun-an

CEBU, Philippines - Padayong gitun-an sa Kapitolyo ang hangyo sa upat ka Homeowners Association (HA) sa barangay Busay , dakbayan sa Sugbo nga mopalit sa mga luna nga ilang gipuy-an nga nahisakop sa Provincial Ordinance 93-1.

Kini human ipalanog sa mga pangulo sa maong mga asosasyon ang ilang tuyo ngadto kang Gobernador Gwendolyn Garcia nga nabati usab sa mga kadagkoan sa mga shelter agencies   ug representante sa City hall sa dili pa dugay nilang panagtagbo.

Ang maong mga asosasyon   naglangkob sa LOT 1331, LOT 1325, LOT 1405 ug LOT 1330 HOME OWNERS ASSOCIATIONS.

Ang hepe sa Division for the Welfare of the Urban Poor sa Cebu City Hall, nga si manlalaban Collin Rosell maoy nagsilbing taytayan sa nahisgutang   mga homeowners association hinungdan nga ilang nahinabi ang gobernador.

Sa maong tigum,ang gobernador mipasabot nga kinahanglan nga makiangayon sa maong mga asosasyon ug sa mga taga lalawigan sa Sugbo ang presyo sa mga luna.

Gipasabot usab sa gobernador nga ang hunta probinsyal sa Sugbo maoy katapusang mohukom kalabot sa presyo ug mohatag kaniya og pagtugot sa pagpirma og kasabotan tali sa mga asosasyon.

Ang presyo kinahanglang ipasubay sa appraisal value, zonal value ug market value.

Sayo niini gipirmahan ni Gobernador Garcia ug Vice-President Jejomar Binay ang Memorandum of Understanding pagsiguro sa abag sa Housing and Urban Development Coordinating Council (HUDCC) sa mga asosasyon sa pagpalit sa mga luna, kansang sakop nga mga ahensiya mao ang mobayad sa kagamhanan sa lalawigan. Sa laing bahin gipahibawo sa gobernador nga iyang ipa-bidding ang LOT 2 sa Busay ug ang mga nag-ukopar niini i-relocate sa mga luna nga nahimutangan sa mga sakop sa Cebu Public School Teachers Association ( CPSTA).

 Si manlalaban Marino Martinquilla, ang OIC Legal Officer sa Kapitolyo mipasabot sa lakang sa gobernador ngadto sa maong mga membro sa asosasyon.

Si Ma. Emma Undaglaus, presidente sa LOT 2 Central Nivel Hills Homeowners Association mihangop sa lakang sa gobernador.

Si Gobernador Garcia daan nang mipahimangno sa mga asosasyon nga dili magpalingla sa mga tawo nga buot manglawgaw sa mga transaksyon tali sa kagamhanan sa lalawigan ug sa mga asosasyon.(/WC)(BANAT NEWS)