24-anyos naghikog

CEBU, Philippines - Patay nang nakit-an sa mga kabanay ang usa ka 24- anyos nga daan nang nanabi sa iyang mga barkada ug kabanay nga magpakamatay pinaagi sa paghikog. Nahitabo kini sa barangay Looc lungsod sa Dumanjug sa alas 9:00 sa buntag apan alas 10:30 na napahibawo ang kapulisan diin usa ka Merlou Fernandez, nagpuyo sa maong lugar ug way trabaho ang naghikog.

Matud ni SPO1 Joselito Abella sa Dumanjug Police Station dihang nahinabi sa Banat News ang igsoon niini nga si Carlo Fernandez maoy nakadiskubre sa patay’ng lawas sa igsuon nga nagbitay na sulod sa ilang balay nga may higot nga pisi sa liog ug ang tumoy gibaat sa kisame sa ilang atop.

Gisuwayan pa unta nila og tabang apan nasuta nga patay na gyud kini.

Matud sa mga silingan ug kabanay niini ngadto sa kapolisan pipila ka adlaw na ang nakalabay nanabi si Fernandez nga buot kining maghikog apan wala nila kini tuohi tungod sa pamasin nga nangomedya ra kini. Wala pa matino sa kapolisan ang hinungdan sa paghikog ni Fernandez. (BANAT NEWS)