CEBU, Philippines - Napugngan sa kapolisan ang gituohang plano unta nga pagpanulis sa usa ka construction firm sa sitio Latasan sa barangay Labogon, dakbayan sa Mandaue dihang nasigpatan sa nagpatrolyang polis ang mga suspek. Nakakuha sa atensyon sa kapolisan ang motorsiklong nag-parking nga gitabonan ang plate number alas-5 pasado sa hapon niadtong miaging adlaw hinungdan nga ilahang gisitar ang mga nagdala niini.
Ang nadakpan mao sila si Adonis Sala, 28, taga Consolacion, Leonardo Sollano Jr., 28, taga sitio Lapyahan sa barangay Labogon, Arcenio Sanchez Jr., 31, taga sitio Lapyahan, barangay Labogon ug Genebee Simblante, 36, taga barangay Tayud sa lungsod sa Consolacion.
Si PO1 Cristito Raboy sa Investigation Detection and Management Bureau (IDM) sa Mandaue City Police Office (MCPO) nga nahinabi sa Banat News nagduda ang mga polis sa gi-parking nga motor tungod kay gipilo ang plate number niini nga may duha ka lalaking daw dunay gipaabot sa atubangan sa construction firm sa maong dapit. Tungod niini giduol sa mga polis ang duha ug dihang gipangutana nagkangakanga og tubag hinungdan nga girekisa silang duha ug nakuhaan og usa ka kalibre .38 nga armas ug ‘shabu.’
Daling gidakop ang duha apan nakamatikod ang mga polis sa pagdalidali og panakay sa lain pang motorsiklo sa duha ka mga lalaki dili layo sa maong dapit nga daling miikyas. Ang duha naapsan sa mga polis ug nailang sila si Sanchez ug Simblante. Ang duha nakuhaan og tagsa ka kalibre .38 nga mga armas, nagduda ang kapolisan nga payroll money ang tuyo sa grupo. (BANATNEWS)