CSU sa Talisay imbestigahon

CEBU, Philippines - Mag-atubang sa imbestigasyon   ang mga kadagkoan sa Civil Security Unit (CSU) sa Talisay gumikan sa kapakyas niini pagdestino og guwardiya sa mga estatuwa sa mga sundawo sa American Landing nga maoy hinungdan matag karon ug unya nga pagkadaot niini.

Mao kini ang bahad ni Talisay City administrator Richel Bacaltos kinsa mipasabot sa iyang kalagot nganong wala kini destinohi og guwardiya sa CSU ang maong land mark.

Matud pa ni Bacaltos nga gumikan sa kawalay guwardiya, walay makabadlong sa mga tawo ilabi na sa mga bata nga maoy magpunay og duwa-duwa sa hawanan sa entablado nga gipabarugan sa pito ka mga estatuwa nga gigastohan og P5 milyones niadtong 2009.

Maoy hinungdan nga may mga estatuwa nga wala nay ilong, may pungkol, may pahak og kilid, mga pusil putol na ug uban pang kadaot niini.

May mga lamppost sa palibot sa mga estatuwa nga wala na magsiga kay gikaon na sa taya ug walay nagtagad sa pag-atiman niini.

Miingon si Bacaltos nga matag tuig nagpabaha ang siyudad og kuwarta aron igasto sa pagpaayo sa maong mga estatuwa.

Sa pagkakaron gipangandaman na usab sa kagamhanan sa maong dakbayan ang pagpaayo sa maong mga estatuwa kay dako kaayo kini og papel   sa paghandom sa ika-67 nga Takas sa Talisay karong Marso 26, 2012.

Ang maong mga estatuwa gipabarug sa daplin sa baybayon sa barangay Poblacion nga mao usab ang lugar diin ipahigayon ang sentro sa tinuig nga kasaulogan.

Ang kanunay nga pagkaguba sa maong mga estatuwa naggumikan sa kakuwang sa proteksyon niini gikan sa mga mangaligoay sa dagat. Sa panahon nga taob ang dagat gihimo kining diving board ang kilid nahimutangan sa mga estatuwa sa mga sundawo.

Gumikan sa kabukas niini sa publiko anha ra magduwa ang mga bata nga mangaligo sa dagat busa dili kalikayan nga mangapiang, mabali, uban pang kadaot nga masugamakan sa mga estatuwa.  - BANAT NEWS