CEBU, Philippines - Gitakdang ikapatuman na ang kamandoan ni Governor Gwendolyn Garcia nga nagpahunong sa operasyon sa Michael Slipsway sa lungsod sa Liloan tungod sa illegal nga pag-operate niini sa maong lugar.
Kini human madawat na ni Cebu Provincial Police Office (CPPO) Director Sr. Supt. Patrocinio Comendador Jr. ang kopya sa Cease and Desist order sa gobernadora batok sa Michael Slipways, Inc. usa ka shipyard nga nagbase sa lungsod sa Liloan.
Gibutyag sa gobernador sa taga media nga ang nag-unang hinungdan sa pagpagawas sa maong kamanduan mao ang nag-ungaw nga kadaut sa kalikopan sa Suba river duol sa silot Bay sa nahisgotang lungsod.
Lakip na usab niini ang kada-ot nga mahiagoman sa panglawas sa katawhan kay hugaw sa chemical nga gigamit sa pagkuskos sa pintal ug ang baho sa pintal sa matag baraderong barko madala sa hangin nga mahanggap sa katawhan sa maong lugar.
Ang gobernador nangkanayon nga gitawagan niya si Comendador kun nadawat na ba niini ang iyang kamandoan aron ikapatuman dayon kini sa daling panahon.
Kahinumdoman nga sa sayo pa napasirad-an na ang maong baraderohan pinaagi sa konseho sa lungsod sa Liloan gumikan sa kapakyas niini sa paglukat og business ug mayor’s permit tungod usab kay wala kini makatuman sa mga gisitar nga dukomento ug regulasyon sa nahisgotang lungsod.
Apan nagpadayon lang gihapon kini sa ilang operasyon ug wala mosanong sa mando sa kagamhanan sa lungsod hinungdan nga giluwatan sa gobernador og cease and desist order ang maong kompaniya. (BANATNEWS)