4 ka bata nakaikyas gikan sa sunog

CEBU, Philippines - Upat ka bata ang nakalingkawas gikan sa ilang balay nga gilamoy sa kalayo alas 12:40 ang takna sa miaging udto dihang ang 6-anyos nga magulang nga lalaki daling nakaaswat sa iyang mga manghod pagawas sa ilang balay diha sa sitio Mahayahay sa barangay Bankal sa maong dakbayan.

Ang maong batang lalaki kansang pangalan wala ibutyag daling migawas dala ang tulo niini ka gagmay nga mga manghod nga nagpanuigon og 4-anyos, 3-anyos ug usa pa ka tuig.

Si SFO1 Atilano Beredo imbestigador Bureau of Fire Protection (BFP) sa maong dakbayan nga nahinabi sa Banat News mibutyag nga duha ka panimalay nga ginama sa light materials nga gipanag-iya nila ni Zacarias Aying ug Juanita Bontuyan maoy naugdaw.

Dugang pa niya nga nag-abang ang pamilya sa upat ka bata sa balay ni Aying, ang maong mga bata ray nahibilin sa balay atol sa pag-ulbo sa kalayo sanglit pulos nanglakaw ang ilang mga ginikanan. Dunay pagdudang nagduwa og posporo ang maong mga bata nga maoy nakaingon sa kalit nga pag-ulbo sa kalayo ug mitapon sa panimalay ni Bontuyan.

Si Beredo miingon nga ilang napugngan sulod sa usa ka minutos ang pagkatap sa kalayo sa uban pang kabalayan.

Gibanabanang P50,000 ang kantidad sa danyos sa maong sunog nga mao nay ikatulong alarma sa sunog sa dakbayan sa Lapulapu niining bulan sa Marso nga atol usab sa pagsaulog sa Fire Prevention Month karong tuiga.  (BANATNEWS)