Usa sa mi-ambush nadakpan

CEBU, Philippines - Gitumbok nga maoy usa sa duha ka suspetsado sa pagbanhig-patay sa manag live-in partner niadtong Miyerkules sa gabii sa barangay Basak sa dakbayan sa Lapulapu nadakpan sa dakbayan sa Sugbu.

Ang suspek nga giila sa kapolisan nga notadong ‘kriminal’ nga si Arnel Gomez alyas ‘Budlat’ nga taga Balagtas St., sa barangay Pahina Central ning dakbayan sa Sugbu nadakpan sa mga sakop sa Special Weapons and Tactics (SWAT) samtang kini nagmaneho sa kolor itom nga Honda motorsiklo nagtangag sa plaka sakay ang iyang asawa.

Usa ka .45 nga kalibre sa armas, nga may mga bala sulod sa magazine niini ug silencer, ingon man shabu ug drug paraphernalia ang nakuha sa posisyon gikan kaniya.

Kagahapon sa buntag si Insp. Zenaido ‘Jun’ Pastorfide sa Crime Against Person Desk (CAPD) sa Lapulapu City Police Office (LCPO) mianha sa Cebu City Police Office (CCPO) aron pagkuha og impormasyon bahin sa suspek.

Kini human duha ka mga saksi ang miila kang Gomez nga maoy usa sa duha ka lalaki nga mibanhig patay nila ni Petronillo Wagas,37, ug sa kapuyo niini nga si Esie Villegas,40, nga nagsakay sa ilang multicab dihang gi-ambush diha sa Magallanes St., sa barangay Basak sa dakbayan sa Lapulapu.

Si Pastorfide nga nahinabi sa Banat News miingon nga positibo gyud nga giila si Gomez sa duha ka saksi apan dili pa nila matumbok kun mao ba kini ang gunman o drayber sa motorsiklo.

Samtang si Sr. Insp. Sanley Sabang hepe sa SWAT sa interbyu sa mga tigbalita nagkanayon nga ang LCPO na ang mo-file og kasong pagpatay batok kang Gomez samtang ang ilang ipasaka nga kaso mao ang paghupot og illegal nga drugas ingon man illegal possession of firearms and ammunition.

Si Gomez nga kasamtangan karung gitanggong sa detention cell sa CCPO hugtanong mihimakak sa iyang kalambigitan sa maong kaso.

Matud niya nga diha ra siya sa ilang balay niadtong higayona ug ang armas nga nakuha sa kapulisan dili kadto iyaha kundili sa iya kadtong higala.

Si Gomez una nang nadakpan niadtong Pebrero 21 diha sa Pahina Central human siya gialarma sa kapulisan nga armado nga sakay sa motorsiklo kuyog sa laing usa ka lalaki nga nagsakay usab og motorsiklo.

Apan nakapiyansa si Gomez sa maong kaso ug nakagawas sa bilanggoan dili palang dugay.

“Wala ko kahibalo pilay gi-piyansa sa akong asawa. Mas maayo pang ila kong patyon kaysa ila kung butang-butangan ana nga wala koy sala,” pamahayag pa ni Gomez ngadto sa media.

Gikatakdang ipa-crossmatching ug ballistic test sa kapolisan ang armas nga nakuha gikan kang Gomez. Anggulo sa yuta sa urban poor maoy gidudahang motibo sa krimen. (EIM)  (BANATNEWS)