CEBU, Philippines - Patay ang manag- live in dihang sila gibanhigan sa duha ka mga lalaking nagmotorsiklo sa barangay Basak dakbayan sa Lapulapu sa milabay’ng gabii.
Ang biktima mao si Petronillo Wagas, 37, ug ang kapuyo niining si Esie Villegas, 40, mga residente sa sitio Good Shephered, barangay Basak sa dakbayan sa Lapulapu.
Sa imbestigasyon sa kapolisan nasayran nga alas 11:30 sa milabay’ng gabii padulong na pauli ang duha luwan sa ilang multicab apan 15- metros nalang diha sa ilang panimalay dihang kalit mibutho ang duha ka tawong nagmotor ug mibabag kanila dayong paulan og bala.
Si Wagas naigo sa iyang liog, bukton nga milahos sa iyang lawas, samtang si Villegas nahiagom og tulo ka samad pinusilan sa iyang dughan.
Gituohang kalibre .45 ang gigamit nga armas sa mga mamumuno base sa nakuhang mga basiyo sa bala diha sa crime scene.
Gidali og dala sa Mactan Doctors Hospital ang duha apan gideklarar silang patay nang miabot sa tambalanan.
Matud pa ni Lapulapu City Police Office director Sr. Supt. Rey Lyndon Lawas ilang tutukan ang maong kaso.
Base sa pasiunang imbestigasyon nagduda ang kapolisan nga dunay tawong nasuko sa duha gumikan sa pamaagi sa pagpatay nga gidul-itan sila pagpusil aron siguradong mapatay ang duha.
Nasuta usab sa kapolisan nga dunay nakaaway si Wagas sa ilang dapit ug sa dihang ilang gisusi ang nakaaway niini (ngan gitago una) wala na kini sa ilang panimalay.
Si PO2 Winston Ybañez sa Homicide Section mibutyag sa Banat News nga pito ka mga kabhang sa kalibre 45 ug tulo usab ka mga deformed slugs ang nakaplagan sa crime scene.
Dugang pa ni Ybañez duna nay mga hulga sa kinabuhi ang duha nga ilang nadawat pinaagi sa text.
Giingong adunay nakaaway nga mga silingan ang duha. (EIM) (BANATNEWS)