Way amotan sa graduation - DepED

CEBU, Philippines - Gipahibalo ni Cebu City Schools Division Superintendent Rhea Mar Angtud nga walay bayranan sa graduation sa mga tinun-an sa pampublikong tunghaan ug dili kini angay ipamugos.

Nagkanayon hinuon si Angtud nga kung dunay bayranan, “voluntary” ra gyud kini nga sinabotan sa Parents and Teachers Association (PTCA). Nasayran nga ang Department of Education matag tuig na nga mipahimangno nga dili angayan pugson ang mga bata sa amotan.

Buot sa DepEd nga uniporme lang sa tunghaan ang ipasul-ob sa mga batang motapos aron dili na makagasto pa ang ilang mga ginikanan.

Matud pa niya nga dili gyud malikayan nga dunay ubang tunghaan ang magtoga gumikan kay ang mga ginikanan mismo ang moinsister niini.

Sumala pa ni Angtud nga nindot kaayo ang bation sa mga ginikanan kung makakita sila nga magtoga ang ilang mga anak apan kinahanglang giuyonan kini sa tanan.

Hinuon matud pang Angtud nga dunay ubang magtutudlo ang mangunay na paggasto sa abangan sa toga sanglit dakong dungog kanila nga makapaso ang ilang mga tinun-an. (BANATNEWS)