Bus nalimbuwad 28 naangol

CEBU, Philippines - Usa ka bus pasaheroan nga giingong nawad-an og brake ang nalimbuwad nga miresulta sa pagkaangol sa siyam ka mga tawo sa kinatibuk-ang 28 niining mga pasahero ang talandugon ang kahimtang.

Ang aksidente nalambigit sa usa ka bus sa Calvo Bus Liner nga may plakang GWH-253 kansang drayber nailhan lang sa pangalan nga ‘Marcial’ nga giingong miikyas human sa aksidente.

Sumala pa sa imbestigasyon mi-overtake ang bus sa gisundang tulo ka sakyanan lakip na ang usa ka dumptruck apan natapsingan niini ang gikasugat nga laing dumptruck.

Tungod sa hitabo nawad-an og kontrol ang drayber ug misaliring sa dalan hangtud nga mikatkat sa pangpang alas-8 pasado sa buntag diha sa sitio Lower sa barangay Mainit sa dakbayan sa Naga.

Ang bus gikan sa dakbayan sa Sugbu ug paingon sa dakbayan sa Toledo nga gihulagway sa mga nakasaksi nga kusog kaayo ang dagan sa maong bus.

Ang siyam nga nagrabehan nakaangkon og bali sa ilang kalawasan, bukton, samad sa ulo ug ubang parte sa ilang kalawasan nga anaa karon sa South General Hospital.

Sila giilang si Louie Conyado, 32; Norma Quisado, 63; Jodan Silanan, 30; Veronico Abatayo, 44; Junriel Gonzales, 17; Henry Coldidera, 22; Roxan Sarda, 22; Marcial Regunta, 54; ug Techu Patoca, 27.

Samtang laing onse ka mga pasahero nga nakaangkon lang og minor injuries ug nadala sa South General Hospital mao sila si Jasmin Repollo; Michael Abella, 21; Mario Shallengo, 51; Rosamar Caranso, 27; Maria Lourdes Caballero, 30, ug iyang usa ka tuig nga anak lalaki nga si Klent, iyang papa nga si Petronilo; Fredie Makalihog, 25; Analuna Canoneo, 21; Susana Sequisabal ug Lolita Lepreso.

Ang laing walo ka pasahero nga maoy naglangkob sa kinatibuk-ang 28 ka pasahero gipapauli sa mga doktor.

Si Pantaleon Cañete Jr., 32, residente sa nahitaboan nga nahinabi sa Banat News mitug-an nga iyang nakit-an nga mitakilid ang bus ug wala na makabawi tungod sa kakusog sa dagan niini pag-overtake sa dumptruck.

Si Ernesto Baclaan, 29, ug drayber sa dumptruck nga naigo sa bus nga nahinabi sa Banat News mitug-an nga hinay ra iyang dagan niadtong tungora ug iyang nakit-an ang paspas kaayong bus nga mi-overtake sa duha ka pribadong sakyanan ug usa ka dumptruck apan kay kurbadahon ang maong lugar napunggit gyud ang iyang walang side mirror.

Si PO2 Kent Cabrera, imbestigador sa Naga City Police Station mitug-an sa Banat News nga sa pasiunang pakisusi sad-an ang drayber sa bus kay mao kini ang miigo sa gikasugat nga dumptruck.

Matud pa niya gikan sa dapit diin magkasaghiray ang bus ug trak sa tunga-tungang bahin sa karsada, miabot og 96 ka tiil una pa nalimbuwad ang bus.(/EIM) (BANATNEWS)