Kampana wa nay gawong

CEBU, Philippines - Ang mga parokyano sa Santa Tereda de Avila Parish sa barangay Poblacion, dakbayan sa Talisay mireklamo ngadto sa ilang kapitan tungod sa pagkawagtang sa karaang kampana sa ilang simbahan. Si Kapitan Teodoro Belleza mibutyag kagahapon sa mga tigbalita nga nadawat niya ang maong  reklamo niadtong Biyernes.

Maoy hinungdan matud pa ni Belleza nga niadtong Lunes mibisita sila sa simbahan ug gihinabi ang Kura Paruko nga si Msgr. Rommel Kintanar bahin   sa maong isyu.

Gibutyag ni Belleza nga nasuta nila sa kampanaryo nga nagpabilin pa ang duha ka dagkong karaang kampana nga nagbitay, apan ang gamay nga kampana maoy nawala.

Apan dihang ilang gisusi, ilang nakita ang gamay nga kampana anaa diay ipatong sa Sakriste (altar) nga wala nay gawong ug maoy bagtingon panahon sa misa.

Ang ubang mga parokyano nga nahinabi sa mga tigbalita kagahapon mibutyag nga base sa ilang mga katiguwangan ang nahisgutang kampana giingong ginama sa silver sa panahon pa sa mga Katsila ug gusto nilang bitayon kini pagbalik sa kampanaryo. Ang mga nag-alagad sa simbahan nangatarungan nga gitangtang nila ang maong kampana kay nangliki na ug bungol pa gyud ang bagting niini.   - BANAT NEWS