Protesta vs oil price hike ilusad

CEBU, Philippines - Dungan sa ipahigayong caravan protest sa mga transport groups sa kaulohan ang secretary sa Alyansang Mamumuo sa Sugbo (AMA-Sugbo) nga si Elpie Caterbas mibutyag nga makigduyog sila dinhi sa maong protesta.

Matud pa ni Caterbas sa Banat News nga momartsa sila sa buhatan sa Department of Energy-7 ug ipanawagan nga ma-rollback ang presyo sa lana aron usab dili na motaas ang pletihan.

Dugang pa ni Caterbas nga walay angayan nga kabalak-an ang mga commuters tungod kay dili man makaapekto sa trapiko ang ilang kalihukan karong adlawa.

Ang maong grupo magsugod og tapok diha sa Fuente Rotunda paatubang na ngadto sa buhatan sa DOE, ang AMA nga may tsapter sa Sugbu gikatahong maoy umbrella organization sa transport groups nga Nagkahiusang Drayber sa Sugbu ug Piston.

Apan ang pangulo sa City Integrated Transport Services and Cooperative (CITRASCO) nga si Ryan Benjamin Yu mibutyag sayo pa kaayo aron mohimo og transport strikes.

Pasabot pa ni Yu nga wala pa sila makaduso sa ilang petisyon alang sa pagsaka sa pletihan.

“Its a premature act kay wala pa gani mi maka-pass sa among petition unya magprotesta na hinuon mi,” pasabot pa ni Yu.  - BANAT NEWS