8 jailguards sa OSC girelibohan

CEBU, Philippines - Pormal nang girelibohan kagahapon sa buntag ang walo ka mga jailguards sa Operation Second Chance nga gireklamong nangulata sa kapin usa ka gatos ka minor offenders sa maong pasilidad diha sa barangay Kalunasan sa dakbayan sa Sugbu.

Si Supt. Efren Nemeño, luyo-luyong pangulo sa Bureau of Jail Management and Penology (BJMP) dinhi sa Central Visayas nga nahinabi sa Banat News nagkanayon nga migawas na ang relieve order sa walo ka jailguards niadtong Martes apan kagahapon sa buntag nila gipatuman.

Ang pagpalagpot kanila may kalambigitan kini sa pag-hostage sa mga batang gi-rehab sa maong pasilidad sa usa ka jailguard ug midemandang pailisan ang walo ka gwardiya nga nangulata kanila.

Ang walo gibutang sa pasilidad nga di makaimpluwensya sa kaso sanglit nagpadayon pa ang imbestigasyon bahin sa pasangil nga pagpangulata.

 “Basin ma-intimidate ang mga bata ini’g kuha og statement sa mga investigators kun naa pa sila (walo) para klaro atong investigation,” sumala pa ni Nemeño kinsa mipasalig nga walay white wash.

Apan sumala pang Nemeño nga hugtanong mihimakak ang walo ka mga jail officers nga ilang gikulata ang mga minor offenders.

Niabag usab sa mga imbestigasyon ang Department of Social Welfare and Development (DSWD) ug lakip sa gikuhaan og pamahayag ang mga ginikanan sa mga bata.

Matud ni Nemeño nasayop lang pagsabot ang mga bata nga sila ibalhin sa male dormitory hinungdan nga nanghagis ang mga minor offenders. Sumala pa niini 100 ray masulod sa maong pasilidad apan miabot na sila karon og 175.

Apan giangkon ni Nemeño nga dunay nahimong lapso ang tulo ka jail officers nga nagpahigayon og head count niadtong higayona tungod kay gidili man unta kanila ang pagsulod.

Duha kanila ang misulod hinungdan nga dihang nagkagubot nabunalan ang duha ka jailguards, usa kanila gitanggong sa kasilyas ug ang usa nakagawas apan nasamad sa ulo, agtang ug dunay fracture ang tuong bukton niini.

Matud ni Nemeño usa sa nabunalan ang usa sa walo ka jailguards nga gireklamo.  - BANAT NEWS