CEBU, Philippines - Kritikal ang usa ka 52 anyos nga babaye human kini dunggaba ug gipanigbas sa iyang bayaw didto sa sitio Kulo, barangay Punta Ingano sa dakbayan sa Lapulapu sa miaging gabii. Ang biktima mao si Susana Saladaga, 52, minyo, samtang ang suspetsado mao si Expideto Lucero, 69 , nga bayaw ug silingan sa biktima. Si SPO1 Allan Pantaleon sa homicide section sa kapolisan sa maong dakbayan nga nahinabi sa Banat News miingon nga nanglimpiyo sa palibot sa ilang balay ang suspetsado ug gilakip sa pagpanguha ang mga dahong laya sa mga saging sa palibot. Apan natigbasan niya ang hayhayan nga alambre sa biktima nga gikasuko sa anak niini nga si Lucero.
Matud pa ni SPO1 Pantaleon nga gumikan sa kasuko ni Lucero nagyawyaw kini, apan dihang nadungog sa suspetsado ang maong yawyaw, mikuha kini (suspek) og sundang sa ilang balay. Dihang nakita ni Lucero nga siyay tuyo sa suspetsado, mikaratel siya og dagan pahilayo sa maong lugar. Gigukod siya sa suspetsado ug dihang nakita kini sa biktima, mibadlong kini sa suspetsado apan siya na hinuoy giatubang sa naulahi ug maoy gihansakan sa sundang ug gipanigbas sa iyang ulo, tiyan, bukton ug uban pang bahin sa lawas.
Dali nga gidala ang biktima ngadto sa Mactan Doctor’s Hospital samtang ang suspetsado nga nadakpan dayon kasamtangang nagkagulkol sa prisohan samtang nagpaabot sa kaso nga iyang atubangon. (BANAT NEWS)