Driver giluba angol sa laing driver

CEBU, Philippines - Kritikal ang kahimtang sa usa ka 31-anyos nga drayber sa traysikol human kini lubaa sa laing drayber sa traysikol didto sa barangay Tabunok, dakbayan sa Talisay kagahapon sa buntag. Ang biktima mao si Deogenes Libusana Idulsa, taga sitio Hollow Block, barangay Tabunok, kinsa samdan sa dughan ug tiyan.

Samtang ang suspetsado mao si Roy Abaquita Pacada, 47, taga sitio Pang-pang, barangay San Isidro, Talisay, nagtingkagol sa Talisay City detention cell human kini masikop ni PO1 Gilbert Cabañero, taga barangay Bulacao, Talisay ug nadestino sa Mabolo Police Station.

Si PO2 Roy Lofranco sa Talisay City Police Station (TCPS) nga nahinabi sa Banat News kagahapon mibutyag nga niadtong higayona si Idulsa naglakaw sa karsada sa Tabunok dihang namasangil kini kang Pacada nga moligis unta kaniya pinaagi sa gimaneho niining traysikol nga maoy hinungdan sa ilang lalis. Gumikan sa kalagot sa biktima gihagit og sinumbagay niini ang suspek.

Apan ang suspek milanit   sa iyang folding knife ug dihang miarangkada ang biktima sa pagkulata kaniya gihansakan niya kini sa iyang kutsilyo

Si PO1 Gilbert Caballero nga taga barangay Bulacao apan tua mag-police sa Mabolo Police Station naatol nga miadto sa Tabunok sa maong higayon ug maoy misikop kang Pacada ug mitugyan niini sa kapolisan sa Talisay.

Nabawi sa kapolisan gikan kang Pacada ang 10 pulgadas nga folding knife ug gibalhug kini sa prisohan, Samtang ang biktima gihatud dayon ngadto sa Vicente Sotto Memorial Medical Center sa dakbayan sa Sugbo. (BANAT NEWS)