Midiwalwal na ang dila napugngan

CEBU, Philippines - Midiwalwal na ang dila sa usa ka tawo nga misulay unta sa paghikog pinaagi sa paghigot og pisi sa iyang liog alas- 8 pasado ang takna sa miaging gabii sa Zone 3 barangay Mantiyong, dakbayan sa Mandaue apan kini napakgang sa mga paryente.

Ang misuway og hikog nga gituohang dunay dakong problema mao si Gestoni Inoc, lumad nga taga Guiwanon, dakbayan sa Bogo.

Si PO1 Jesson Estrera sa kapolisan sa Presinto 1 sa Mandaue City Police Office (MCPO) nga nahinabi sa Banat News nagkanayon nga migamit og plastic straw si Inoc sa paghikot sa iyang liog. Apan maayo nalang nga sa wala pa kini hingpit mabugtoi sa gininhawa naabtan kini sa mga kabanay kinsa daling miputol ug mitangtang sa hikot ug gidala kini sa Mandaue City Hospital.

Matud pang Estrera base sa ilang nahipos nga kasayuran gikan sa mga silingan ni Inoc giingong ikaduha na kining pagsulay og hikog ni Inoc apan kanunay’ng mapakgang.

Wala pa matino sa kapolisan ang hinungdan sa suway paghikog ni Inoc apan gituohang aduna kini dakong problema.  - BANAT NEWS