Barangay fire brigade banhawon

CEBU, Philippines - Gimando ni Mayor Michael Rama nga banhawon ug himuong aktibo ang tagsatagsa ka mga barangay fire brigades sa dakbayan aron makatabang panahon sa emerhensiya.

Kini maoy alternatibong solusyon nga nahunahunaan sa mayor samtang wala pa makompleto ang gikinahanglang dugang kagamitan sama sa firetrucks sa kabomberuhan.

Gimandoan ni Rama ang Cebu City Risk Reduction Management Council pinangulohan ni Alvin Santillana nga ipaaktibo ang mga barangay fire brigades human niya masayring dunay ubang barangay nga dili aktibo sa maong programa.

Ang barangay fire brigades nga dugay nang gi-organisar kaniadto giporma aron makatabang sa pag-edukar sa mga molupyo kontra sunog, pagtabang panahon na sa aktwal nga dunay sunog ug ang pagpahimutang sa mga tawo sa susamang mga sitwasyon.

Gitambagan usab kagahapon sa presiding officer sa Police Coordinating and Advisory Council (PCAC) nga si Eugene Elizalde si Sr. Supt. Aderson Comar nga mohimo og lapad nga pagtuon kung unsay mga kakuwangon sa kabomberuhan sa kagamitan ilabi na sa mga firetrucks.  - BANAT NEWS